Öryggisdagar Blue Car Rental

Í byrjun mars voru öryggisdagar haldnir hjá Blue Car Rental, þar sem starfsmenn allra deilda sóttu fjölbreytt öryggisnámskeið. Markmiðið var að efla öryggisvitund starfsfólks og tryggja öruggari vinnustað fyrir alla.

Öryggi í fyrirrúmi

Hjá Blue Car Rental er öryggi starfsfólks og viðskiptavina ávallt í forgangi. Fyrirtækið leggur mikla áherslu á öryggismál enda lykilþáttur í starfsemi okkar og fyrirtækjamenningu.

Öryggisdagarnir voru mikilvægur hluti af því og náðu til þriggja helstu sviða: skyndihjálpar, sjálfsvarnar og brunavarna.

Skyndihjálparnámskeið

Öllu starfsfólki fyrirtækisins var boðið skyndihjálparnámskeið á vegum Rauða kross Íslands, þar sem farið var yfir grunnatriði skyndihjálpar. Þeir sem sóttu námskeiðið fengu fræðslu og þjálfun í hjartahnoði, notkun hjartastuðtækis, viðbrögðum við köfnun og notkun ofnæmispenna. Námskeiðin voru bæði á íslensku og ensku, og að þeim loknum fengu þátttakendur skyndihjálparskírteini.

Sjálfsvarnarnámskeið

Einnig var boðið upp á sjálfsvarnarnámskeið fyrir starfsfólk í framlínu fyrirtækisins, þar sem farið var yfir viðbrögð við aðstæðum sem geta kallað á sjálfsvörn. Námskeiðið var tveggja tíma langt og var sérstaklega ætlað starfsfólki í afgreiðslu og öðrum framlínustörfum.

Brunavarnanámskeið

Að auki sótti starfsfólk brunavarnanámskeið á vegum Securitas, þar sem lögð var áhersla á forvarnir og viðbrögð við eldhættu. Í lok námskeiðsins fengu starfsmenn tækifæri til að prófa að slökkva eld með slökkvitæki, sem var bæði gagnlegt og fræðandi.

Öryggi er ávallt í forgangi hjá Blue Car Rental, bæði fyrir starfsfólk og viðskiptavini. Við trúum því að með aukinni öryggisvitund starfsmanna verður vinnustaðurinn ekki aðeins öruggari heldur þjónustan við viðskiptavini enn betri.